Tue 09 Mar 2010, လွတ်လပ်သောမွန်သတင်းအေဂျင်စီ
နယ်အသီးသီးမှ မီးရထားဖြင့် ရန်ကုန်သို့တက်လာသည့် သံဃာတော်များ ဘူတာရုံတွင် သက်ဆိုင်ရာအာဏာပိုင်များထံ အရင်ဦးဆုံးစစ်ဆေးခံပြီးမှ သွားလိုရာကို သွားနိုင်ကြောင်း သိရသည်။
“ရထားပေါ်ကနေဆင်းတော့ သူတို့လူ ၃/၄ ယောက်နဲ့ စားပွဲမှာ ထိုင်နေတယ်၊ ဘယ်ကနေလာတာလဲ၊ ဘယ်သွားမှာလည်း၊ ဘာလာလုပ်တာလဲအစရှိတာကိုမေးမြန်းပြီးမှ သွားခွင့်ပြုတယ်၊ ဒကာတွေတော့မပါဘူး၊ သံဃာတွေပဲ အဲလိုမေးမြန်းတယ်” ဟု အစစ်ဆေးခံထားရသည့် သံဃာတော်တစ်ပါးက မိန့်သည်။
ယခုလိုမျိုး သံဃာတော်များစစ်ဆေးနေခြင်းသည် မီးရထားဖြင့်ခရီးသွားသံဃာတော်များသာ စစ်ဆေးခံနေရပြီး၊ ကားဖြင့် ခရီးသွားသံဃာတော်များ စစ်ဆေးမှုမရှိသေးကြောင်းလည်း သိရသည်။
“ဒီလိုမျိုး စစ်ဆေးနေတာ တခါမှတော့ မတွေ့ဖူးဘူး၊ ခါတိုင်းရန်ကုန်တက်တာ ဒီလို စစ်ဆေးမှုတာ မရှိဘူးပေါ့၊ ကြည့်ရတာ ဒီလကနေပဲ ဒီလိုစစ်တာ” ဟု အထက်ပါ သံဃာတော်က မိန့်သည်။
ရန်ကုန်မြို့ပေါ်သို့ ရောက်ရှိလာသည့် ဧည်သည်တော်များအတွက်လည်း ယခင်ကထက် ဧည့်စာရင်းတိုင်ကြားခြင်းကို ပိုမိုတင်းကြပ်ထားကြောင်းသိရသည်။
“ကားနဲ့ ခရီးသွားတဲ့ခရီးသည်တွေ သံဃာတော်တွေကျတော့ သိပ်ပြီး အစစ်ဆေးမခံရဘူး၊ သွားတဲ့လမ်းတစ်လျောက်မှာပဲ စစ်ဆေးတာရှိတယ်၊ အားလုံးကိုစစ်တယ်၊ ဘုန်းကြီးတွေပဲမဟုတ်ပါဘူး၊ အခြေအနေပေါ်မူတည်ပြီးတော့ စစ်တယ် တခါတလေ ၃/၄ ခါလောက်စစ်တယ် မော်လမြိုင်ကနေ ရန်ကုန်ရောက်ဖို့ကို တခါတလေဆို တခါပဲ ဆင်းရတယ်” ဟု ရန်ကုန်သို့ ခရီးသွားခဲ့သူတစ်ဦးက ပြောသည်။
နယ်မှ ရန်ကုန်သို့ ခရီးသွားလာနေကြသည့် ခရီးသည်အများစုမှာ ဆေးခန်းသို့တက်ရောက်သူများ၊ ဘုရားဖူးများ၊ နိုင်ငံခြားသို့ထွက်လိုသူများအပါအဝင် ကုန်သည်တို့က အများဆုံးသွားလာနေကြသည်။
“အခုတလောသွားလာနေရတာ တော်တော်ခတ်ခဲတယ်၊ လွတ်လပ်မှုမရှိဘူး၊ ဘယ်နေရာပဲသွားသွား စစ်ဆေးမှုတွေက ရှိနေတာပဲ၊ အခမတင့်ရင်လည်း ပိုက်ဆံပါတောင်းတယ်၊ တော်တော်ဆိုးတာပဲ” ဟု မော်လမြိုင်မှ နိုင်ငံရေးလေ့လာသုံးသပ်သူတစ်ဦးက ပြောသည်။
Thursday, March 11, 2010
Subscribe to:
Post Comments (Atom)
0 comments:
Post a Comment