Wednesday, March 31, 2010

မလေးရှားရောက် အလုပ်သမားများ အဖမ်းအဆီးကြမ်းခြင်းနှင့် ရင်ဆိုင်နေရ

Wed 31 Mar 2010, မင်းတော်လဝီ
မလေးရှားနိုင်ငံတွင် အလုပ်လုပ်ကိုင်နေကြသည့် ရွေ့ပြောင်းအလုပ်သမားများ ပိုမိုဖမ်းဆီးနေပြီး၊ အထူးသဖြင့် မြန်မာအလုပ်သမားများ နေထိုင်များသည့်နေရာတွေမှာ အဖမ်းအဆီးကြမ်းနေသည်။

“ကွာလာလမ်ပူမြို့ပေါ်ရှိ ကိုတာရာယာ ရပ်ကွက်မှာဆိုရင် မြန်မာနိုင်ငံသား အလုပ်သမားတွေပဲ များတယ်၊ အဲဒီနေရာကိုပဲ အဓိကထား လာဖမ်းနေတယ်၊ ဘာဖြစ်လို့လဲဆိုတော့ အဲဒီနေရာဟာ ဗမာပြည်ကလာဖွင့်ထားတဲ့ ရွှေဆိုင်တွေ စားသောက်ဆိုင်၊ စတိုးဆိုင်တွေရှိတယ်ဆိုတော့ ဗမာပြည်သားတွေလည်း တော်တော်များတယ်” ဟု ထိုရပ်ကွက်ရှိ စတိုးဆိုင်တဆိုင်မှာ အလုပ်လုပ်နေသည့် မြန်မာအလုပ်သမား ကိုမင်းသူက ပြောသည်။

ယခင်က မလေးရှားနိုင်ငံတွင် အလုပ်လုပ်နေကြသည့် တရားမဝင်ရွေ့ပြောင်းအလုပ်သမားများကိုသာ ဖမ်းဆီးလေ့ရှိသော်လည်း ယခုနောက်ပိုင်း တရားဝင်ဖြင့် အလုပ်လုပ်နေသူများကိုလည်း အော်ပရာစီအဖွဲ့တို့က ဖမ်းဆီးနေကြသည်။

“အဖမ်းအဆီးက အမြဲတမ်းတော့ ရှိတက်ပေမယ့်၊ ဒီမတ်လ ၂၇ ရက်နေ့ စနေနေ့မှာပေါ့ အဖမ်းအဆီးက တော်တော်ကြမ်းတယ်၊ ရွှေဆိုင်လိုမျိုး၊ စတိုးဆိုင်လိုမျိုးတွေကို အတင်းဝင်ပြီး၊ မွှေနှောက်ရှာဖွေဖမ်းတယ်၊ ခါတိုင်းဆို လမ်းသွားလမ်းလာတွေကိုပဲ မေးမြန်းဆွဲခေါ် ဖမ်းတာပဲရှိတယ်၊ စနေနေ့ဆိုတော့ ဈေးဝယ်ထွက်သူတွေ ငွေလဲသူတွေ အပြင်ထွက်သူများနေတော့ အများဆုံးအဖမ်းခံရတယ်၊ အဲဒီတစ်ရက်ထဲကိုပဲ လူ ၄၀၀ လောက်ဖမ်းသွားတယ်၊ ဗမာတွေ အများကြီးပါတာပေါ့” ဟု ကိုတာရာယာရပ်ကွက်တွင် စားသောက်ဆိုင်ဖွင့်ထားသည့် မြန်မာအမျိုးသမီးတစ်ဦးက ပြောသည်။

ထိုသို့အဖမ်းဆီးခံရသူများကို (KIA camp) သို့ခေါ်ဆောင်သွားပြီး၊ ထိုရောက်မှသာ ပတ်စပို့စ်ပြနိုင်သူများကို ပြန်လွှတ်ပေးပြီး၊ တရားဝင်နေထိုင်သူဖြစ်ကြောင်း သက်သေခံတစုံတရာမရှိသူများကို ထိုစခန်းတွင် ဆက်လက်ချုပ်နှောင်ထားသည်။

“ဒီလထဲမှာဖမ်းတာ ဆီးတာ နည်းနည်းတော့ စိပ်လာတယ်၊ ၁၅ ရက် ၁၈ ရက်နေ့တုန်းကလည်း စက်ရုံ အလုပ်ရုံတွေမှာဝင်ဖမ်းတယ်၊ ဖမ်းပြီးတော့ လူဝင်မှုကြီးကြပ်ရေးဥပဒေနဲ့ အရေးယူပြီး အချုပ်ခန်းထဲမှာ ထည့်ထားတယ်၊ တချို့နှစ်လလောက်ချုပ်ထားပြီးတော့ ပွဲစားကနေတဆင့် မလေးရှား ရင်းဂစ် ၃၀၀၀ နဲ့ရွေးထုတ်ရတယ်” ဟု မလေးရှားရွှေ့ပြောင်း အလုပ်သမားအရေး ဆောင်ရွက်ပေးနေသူတစ်ဦးက ပြောသည်။

မြန်မာနိုင်ငံသားအပါအဝင် နိုင်ငံခြားသား ရွေ့ပြောင်းအလုပ်သမားများ ဖမ်းဆီးရာမှာ ပတ်စပို့စ်ပဲရှိရှိ ယူအန်ကဒ်ပဲကိုင်ကိုင်အားလုံးဖမ်းတာပဲ၊ တချို့အလုပ်သမားတွေ အလုပ်ရှင်က ပတ်စပို့စ် သိမ်းထားတော့ ခိုင်လုံသည့်အထောက်အထားမပြနိုင်လို့ အဖမ်းခံရပြီး၊ ရဲစခန်းရောက်ပြီးမှ ပြန်လည်လွတ်မြောက်လာသည်ဟု မလေးရှားတွင် တရားဝင် နေထိုင်သူတစ်ဦးက ပြောသည်။

ယခုလို မလေးရှားနိုင်ငံမှာ အဖမ်းအဆီးကြမ်းတမ်းလာနေရခြင်းမှာ မတ်လ ၂၇ ရက်နေ့က ကွာလာလမ်ပူလေဆိပ်မှာ လူမှောင်ခိုကူးခံရသည့် မြန်မာနိုင်ငံသား ၄ ယောက်အပါအဝင် နိုင်ငံခြားသား ၁၆ ယောက်တို့က လူဝင်မှုကြီးကြပ်ရေးထိန်းသိမ်းစခန်းမှာ ထိန်းချုပ်ထားရာမှ ထွက်ပြေးသွားသောကြောင့် ယခုလို အဖမ်းအဆီးပိုမို ကြမ်းတမ်းလာနေကြောင်း မလေးရှားတွင် အလုပ်လုပ်နေကြသည့် ရွေ့ပြောင်းအလုပ်သမားတို့က ပြောသည်။

0 comments:

Post a Comment