Wed 17 Mar 2010, ကွန်းဟဒေ့
မွန်ပြည်နယ်အတွင်း အထူးသဖြင့် မော်လမြိုင်-ရေး ကားလမ်းတစ်လျှောက်ရှိ ဂိတ်များမှာ အစိုးရ အာဏာပိုင်အဖွဲ့အစည်းတို့မှ မော်တော်ဆိုင်ကယ်ဖြင့် ခရီးသွားလာနေသူများအပေါ် စစ်ဆေးမှု ပိုမိုတင်းကြပ်ထားသည်။
ယခုလို အာဏာပိုင်တို့မှ စစ်ဆေးမှုပြုလုပ်လာနေသည်မှာ လွန်ခဲ့သည့် ဖေဖော်ဝါရီလမှစတင်ခဲ့ပြီး၊ စစ်ဆေးမှုမှာ တဖြည်းဖြည်းတင်းကြပ်လာနေသည်။
“ပထမတုန်းက လိုင်စင်မရှိတဲ့ ဆိုင်ကယ်တွေကို ဖမ်းဖို့လို့ ကျနော်ထင်တယ်၊ ဆိုင်ကယ်ဖမ်းတာမဟုတ်ဘူး၊ ဆိုင်ကယ်မှာ ဘာပါလာသလဲပေါ့၊ ဆိုင်ကယ်နောက်ဖုံးတွေကို ဖွင့်ပြီးစစ်တယ်၊ စစ်ပြီးလို့ ဘာမှမတွေ့ဘူးဆိုရင် သွားခွင့်ပေးတာ၊ သူတို့ဘာကို အဓိကထားပြီး စစ်တာလဲဆိုတာကိုတော့ ကျနော်တော့မသိဘူး” ဟု သံဖြူဇရပ်မှ မော်လမြိုင်သို့အတက် လမ်းမှာ အစစ်ဆေးခံထားရဖူးသူတစ်ဦးက ပြောသည်။
မော်လမြိုင်-ရေးကားလမ်းတစ်လျှောက်ရှိ ဂိတ်ဖွင့်ထားသည့် နေရာတွေမှာ ရဲ၊ စစ်တပ်တို့အပါအဝင် အခြားဌာနမှတာဝန်ရှိများစုပေါင်းထားသည့် (အဖွဲ့ပေါင်းစုံ) တို့မှ အင်အား ၂၀ ခန့်ဖြင့် စောင့်နေကြသလို တချို့ဂိတ်တွေမှာ အင်အား ၅၀ ခန့်အထိ စောင့်ဆိုင်းစစ်ဆေးမှု ပြုနေသည်။
အစစ်ဆေးခံရသော အခြားခရီးသွားအများစုသည်လည်း မည်သည့်အကြောင်းကြောင့် အာဏာပိုင်အဖွဲ့အစည်းတို့က စစ်ဆေးနေသည်ကို မသိရှိရကြောင်း ၄င်းခရီးသွားက ပြောသည်။
“အရင်ကစစ်ဆေးတာထက်ကို ထူးတော့ ထူးခြားနေတယ်၊ အဖွဲ့ပေါင်းစုံထဲမှာ စာအုပ်စာတမ်းတွေနဲ့ ပြီးတော့ ဥပဒေဆိုင်ရာဌာနကလို့ထင်ရတဲ့လူတွေလည်းပါတယ်၊ မသင်္ကကာတဲ့လူဆိုရင် ဆိုင်ကယ်ကို အသေအချာစစ်ပြီးတော့ ဘယ်ကိုသွားမှာလဲ၊ ဘယ်ကနေလာတာလဲ စသဖြင့်ပေါ့ အဲလိုမေးပြီးတော့ သွားခွင့်ပြုတယ်” ဟု မော်လမြိုင်မြို့ခံတစ်ဦးက ပြောသည်။
ဝေဖန်သုံးသပ်သူတချို့က သံဖြူဇရပ်မြို့ပေါ်မှာ မွန်သံဃာတော်တစ်ပါး အဖမ်းခံရပြီးနောက်ပိုင်း၊ ယခုကဲ့သို့ စစ်ဆေးမှုများကို အာဏာပိုင်တို့မှ တင်းကြပ်စွာ စစ်ဆေးလာခဲ့ပြီး၊ ယခုအချိန်အထိ ဆက်လက်စစ်ဆေးနေဆဲဖြစ်သည်။ ဆိုင်ကယ်ဖြင့် ခရီးသွားလာသူများကိုသာ စစ်ဆေးမှု ပြုလုပ် ရခြင်းမှာ ဆိုင်ကယ်အတွင်း ဖောက်ခွဲရေးပစ္စည်းများ ပါ၊ မပါကို စစ်ဆေးလိုခြင်း ဖြစ်သည်ဟု အာဏာပိုင်အဖွဲ့အစည်းတို့၏ ပြောဆိုချက်ကိုကိုးကားပြီး၊ သံဖြူဇရပ်မြို့နယ်အတွင်းရှိ ကျေးရွာဥက္ကဌနှင့် နီးစပ်သူတစ်ဦးက ပြောသည်။
ဖောက်ခွဲရေးပစ္စည်းကိုသာ အဓိကထားစစ်ဆေးခြင်းဖြစ်သည်ဟု အာဏာပိုင်တို့ဘက်မှ ပြောဆိုသော်လည်း ထိုအကြောင်းပြချက်သည် မခိုင်လုံကြောင်းနှင့် နိုင်ငံရေး လှုပ်ရှားနေသူများ အလန့်တကြာဖြစ်စေရန် မြန်မာစစ်အစိုးရတို့၏ နည်းဗျူဟာဖြစ်သည်ဟု နိုင်ငံရေး လေ့လာသုံးသပ်တစ်ဦးက ပြောသည်။
Wednesday, March 17, 2010
Subscribe to:
Post Comments (Atom)
0 comments:
Post a Comment