အလုပ်သမားငါးသိန်း ပြန်ပို့မည့်အစီအစဉ်ကြောင့် မိသားစုဝင်များ စိုးရိမ်နေကြ

Wed 10 Mar 2010, ကွန်းချမ်း
ထိုင်းအလုပ်အကိုင်ဦးစီးဌာနမှ ၄င်းတို့သတ်မှတ်ထားသည့် မတ်လ ၂ ရက်နေ့အထိ အလုပ်သမားမှတ်ပုံတင်ခြင်းမပြုရသေးသူ နိုင်ငံခြားအလုပ်သမားများကို နေရပ်သို့ပြန်ပို့မည့်သတင်းကြောင်း အလုပ်သမားမိသားစုဝင်များ စိုးရိမ်နေကြကြောင်းသိရသည်။

ထိုင်းအလုပ်အကိုင်ဦးစီးမှုဌာနမှ ၄င်းတို့ သတ်မှတ်ထားသော မတ်လ ၂ ရက်နေ့အထိ လာရောက်မှတ်ပုံတင်ခြင်းမရှိသော နိုင်ငံခြားအလုပ်သမားအားလုံးကို လူဝင်မှုကြီးကြပ်ရေးအဖွဲ့နှင့် ရဲတပ်ဖွဲ့တို့ ပူးပေါင်းပြီး ဖော်ထုတ်အရေးယူသွားမည်ဟု သိရသည်။ မြန်မာနိုင်ငံအပါအဝင် ကမ္ဘောဒီးယားနှင့် လာအိုနိုင်ငံသား တရားမဝင်အလုပ်သမားများကို မတ်လ ၃ ရက်နေ့မှ ဖော်ထုတ်ကာ နေရပ်သို့ ပြန်ပို့မည်ဟု သိရသည်။

“တကယ်လို့ ပြန်အပို့ခံရရင်တော့ သူတို့လုပ်တက်ကိုင်တက်တဲ့အလုပ်အတွက် အချိန်ယူရှာရဦးမယ်၊ ဒီမှာက ဟိုမှာလိုမျိုး ပင်ပန်းရင် ပင်ပန်းသလောက် ပိုက်ဆံရမှာလည်းမဟုတ်ဘူး၊ မိဘတွေလုပ်နေတဲ့ လယ်ယာလုပ်ငန်းတွေမှာ ဝင်လုပ်ဖို့ကလည်း သူတို့အနေနဲ့ အပင်ပန်းခံနိုင်မှာမဟုတ်ပါဘူး၊ ထိုင်းနိုင်ငံသို့ ထပ်မသွားဖြစ်ရင်တောင် စာအုပ်လုပ်ပြီး တခြားနိုင်ငံကို ထွက်ဖြစ်မယ်ထင်တယ်” ဟု ယာယီနိုင်ငံကူးလက်မှတ်မရှိသေးသည့် အလုပ်သမားတစ်ဦး၏မိခင်မှ ပြောသွားသည်။

ပြည်တွင်းအလုပ်အကိုင်ရှားပါးမှုကြောင့် မြန်မာနိုင်ငံမှ လူလတ်ပိုင်းအများစု အလုပ်လုပ်ကိုင်ရန် ဝန်ဆောင်ခသက်သာသည့် ထိုင်းနိုင်ငံသို့ အများဆုံးသွားရောက်အလုပ်လုပ်ကြသည်။

ပြည်ပမှာ အလုပ်လုပ်ခြင်းဖြင့် အတွေ့အကြုံအသစ်၊ ပတ်ဝန်းကျင်အသစ်၊ အပေါင်းအသင်းအသစ်နှင့် ခင်မင်ကျင်လည်လိုသည့် စိတ်ဆန္ဒကြောင့် နီးစပ်ရာထိုင်းနိုင်ငံမှာ လွယ်လင့်တကူ အလုပ်လုပ်နေကြသလို ၄င်းတို့ ကောင်းမွန်သည့်လုပ်အားခဖြင့် မိသားစုဝင်များကို ရရှိစေသည့်အတွက် အများစုမှာ နယ်စပ်မှတဆင့် ထိုင်းနိုင်ငံသို့ ရောက်ရှိလာကြသည်။

ထိုင်းအလုပ်အကိုင်ဦးစီးဌာန၏ မူဝါဒအသစ်တွေကြောင့် ပြန်အပို့ခံရမည့်အလုပ်သမားများမှာ နစ်နာမှုများရှိနေပြီး၊ ပြန်အပို့ခံရသူတွေအနေနှင့် ပြည်တွင်းအလုပ်အကိုင်မသေချာမှုက ပိုမိုစိုးရိမ်ဖွယ်ဖြစ်ကြောင်း သုံးသပ်နေကြသည်။

“အခုလို အခက်အခဲတွေ့နိုင်တာက နိုင်ငံကူးလက်မှတ် မလုပ်ဖြစ်ရသေးတဲ့လူအသစ်တွေပဲ၊ ဘာလို့လည်းဆိုတော့ သူတို့အတွက် အရင်းကျေဖို့ နေနေသာသာ ဘတ်တစ်သောင်းတန် နိုင်ငံကူးလက်မှတ်လုပ်ဖို့ မဖြစ်နိုင်ပါဘူး၊ နွေရာသီအချိန်မှာဆို အလုပ်အကိုင်တွေလည်း နားထားတော့ ပြည်တွင်းရောက်ရင်လည်း အလုပ်အကိုင်ရရှိမှာမဟုတ်ဘူး၊ ပြီးတော့ ထိုင်းကနေ လစဉ်ပုံမှန်ဝင်ငွေ ရနေတဲ့ မိသားစုတွေလည်း ငွေမရတော့ဘူးဆိုရင် အခက်အခဲဖြစ်လာမယ် ဒါနဲ့နောက်ဆက်တွဲ ပြဿနတွေလည်းရှိလာနိုင်တယ်” ဟု ချောင်းဆုံမြို့နယ်မှ ခရီးသွားဝန်ဆောင်မှုပေးနေသူ အသက် ၄၀ အရွယ်အမျိုးသားတစ်ဦးက ပြောသည်။

နိုင်ငံတကာရွေ့ပြောင်းနေထိုင်သူများအဖွဲ့ (IOM) ၏ ၂၀၀၉ ဇူလိုင်လ တရားဝင်သတင်းထုတ်ပြန်ချက်များအရ လူကုန်ကူးခံရမှုအပါအဝင် ထိုင်းနိုင်ငံတွင် အလုပ်လုပ်ကိုင်နေသူ မြန်မာနိုင်ငံသားစုစုပေါင်း ၃ သန်းအထိရှိနိုင်သည်ဟု ဖော်ပြထားသည်။ ပြည်တွင်းအလုပ်အကိုင်ရှားပါးမှုကြောင့် ထိုင်းနိုင်ငံမှ သွားရောက်အလုပ်လုပ်ကိုင်နေရသူ နိုင်ငံသားများ ပြန်အပို့ခံရပါက ပြည်တွင်းရှိ ၄င်းတို့၏ မိသားစုများအတိုင်းအတာတခုအထိ ထိခိုက်နိုင်ကြောင်း သိရသည်။