Tue 30 Mar 2010, အာကာ
မွန်ပြည်ပြန်လည်ထူထောင်ရေးပါတီ (MRP) မှ တပ်သားများ တပ်တွင်း မကျေလည်မှုများကြောင့် တဖွဲဖွဲ အနားယူနေကြကြောင်း ထိုပါတီနှင့် နီးစပ်သူများက ပြောသည်။
“ကျနော်တို့တပ်မှာ ရာထူးရထားကြတဲ့ သူတွေ တပ်ရေးရာနဲ့ ပတ်သက်တဲ့ သဘောတရားကို နားလည်တာ နည်းတယ်၊ အပြောကတော့ ကောင်းကြတယ် ပြတ်သားကြတယ်၊ ဒါပေမယ့် အလုပ်လုပ်တဲ့ နေရာမှာတော့ မပြတ်သားကြဘူး၊ တပ်သားတွေနဲ့ ပြေပြေပြစ်ပြစ် ဆက်ဆံတာ မရှိကြဘူး၊ ဒါ့ကြောင့် တပ်ထဲကနေ တဖွဲဖွဲ ထွက်နေကြတယ်” ဟု မကြာခင်က ထိုပါတီမှ အနားယူခဲ့သည့် တပ်စိပ်မှူးတစ်ဦးက ပြောသည်။
ယခု ၂၅ ရက်နေ့တွင် တပ်စိပ်မှူးအပါအဝင် တပ်သား ၅ ဦးနှင့် ၂၆ ရက်နေ့တွင် တပ်သား ၂ ဦး ပါတီမှ အနားယူပြီး နယ်စပ်မှတဆင့် ထိုင်းနိုင်ငံ စူရတ်ဌာနီသို့ ရောက်ရှိလာကြကြောင်း ဒေသခံများက ပြောသည်။
“မကြာခင်ကပဲ ကျနော်တို့ ရှေ့တန်း ထွက်ကြတယ်၊ ရှေ့တန်းက ပြန်ရောက်လာတော့ တပ်မှူးတွေက ကျနော်တို့အပေါ် ပြုမူဆက်ဆံတာတွေကို ဌာနချုပ်မှာ ပြန်တင်ပြတယ်၊ ဌာနချုပ်က ကျနော်တို့ တင်ပြတာတွေကို နားမထောင်ဘူး၊ ဒီလိုဆို ကျနော်တို့ ရှေ့ဆက်ပြီး အလုပ်လုပ်လို့ မဖြစ်တော့ဘူးလို့ အချင်းချင်း တိုင်ပင်ပြီး ပါတီက ထွက်လာတာပါ” ဟု စူရာတ်သို့ရောက်ရှိလာသည့် တပ်သားတစ်ဦးက တပ်မှထွက်ခွာခဲ့ရသည့် အကြောင်းကို ပြောသည်။
ယခင်ကတပ်သားအင်အား ၁၅၀ ဝန်းကျင်ရှိရာမှ ယခုတပ်သားအင်အား ၅၀ ခန့်သာ ကျန်ရှိတော့ကြောင်း ပါတီဝင်တစ်ဦးက ပြောသည်။
နိုင်ပန်းညွန့် (ယခင် ဗိုလ်မှူးကြီးဟောင်း မွန်အမျိုးသားလွတ်မြောက်ရေး တပ်မတော်၊ မွန်ပြည်သစ်ပါတီ) ဦးစီးသည့် မွန်ပြည်ပြန်လည်ထူထောင်ရေးပါတီသည် တနင်္သာရီတိုင်း ထိုင်း-မြန်မာနယ်စပ်တွင် အခြေစိုက်ပြီး၊ တပ်သားအင်အား လျှော့နည်းခြင်း၊ ထိုင်းနယ်ခြားစောင့်တပ်၏ ဖိအားပေးခြင်းနှင့် ရင်ဆိုင်နေရသည်။
ယခင်က မွန်ပြည်ပြန်လည်ထူထောင်ရေးပါတီ ဗဟို၏ တည်ရာသည် ထိုင်းနယ်စပ်နှင့် အလွန်နီးကပ်စွာ တည်ရှိပြီး မကြာမီကပင် ထိုင်းနယ်ခြားစောင့်တပ်မှ တပ်တည်ခွင့်ကို နယ်စည်းခြားမျဉ်းနှင့် ၁၀ ကီလိုမီတာအပြင်ဘက်တွင်သာ ထားရှိရန် ဖိအားပေးခဲ့သည်။
Tuesday, March 30, 2010
Subscribe to:
Post Comments (Atom)
0 comments:
Post a Comment